علاج الكسل حاجة والحول حاجة تانية بمعني إن لما الطفل بيلبس نظارة ده بيعالج الحول و لو متحسنش بالنظارة بيعمل عملية، اما الكسل فبيتعالج بغطاء العين وعلشان كده مينفعش الام تقول غطيت العين مثلا ٣ شهور والحول متحسنش لان الغطاء مش علاج للحول ده علاج العين لكسل العين،

مفيش علاج للكسل بعد سن العشر سنوات او مجازا الى ١٢ سنه فمينفعش واحد عنده مثلا عشرين سنه و يقول اعالج الكسل ازاي، للاسف ملوش علاج للكبار.

نظاره الاستيجماتيزم مبتحسنش الحول لا الانسي و لا الوحشي و لا الرأسي لكن نظاره طول النظر ممكن تحسن الأنسي و قصر النظر ممكن تحسن الوحشي احيانا

علاج الكسل بيختلف من مريض لآخر يعني منقدرش نحضر اكلاشيه لعلاج الكسل لان كل طفل يختلف من الآخر فحسب درجه ضعف الابصار وقياس النظر وسن الطفل بنحدد خطة العلاج للحالة ودايما تختلف من طفل لآخر

كثير من الأمهات بيبعتوا صور لأولادهم بالحول مثلا و ده ممتاز و لكن غير كافي لان مريض الحول يلزم فحصه بالعياده لتحديد حاجات كتيره زي قياس زاويه الحول بالمنشور و عمل الكومبيوتر الخاص بالاطفال بعد وضع قطره التوسيع و قاع العين و التي علي ضوئها تحدد خطه العلاج..